Glooscap Changes Bad into GOOD

KLU’SKAP KAWASKA’TOQ WINJIK KELU’LKIKTUK

Ilakenutk kisiku: Charles Solomon tley Kingsclear,
Luke Simon tley Big Cove

Ta’n tuju Klu’skap oqwa’tek, wejietek apaqtuk, pemayjimkwep ut kwitenemk, toqo kuntewiktuk wejitasik. Na ke’kutesink jajiktuk, kikju nike’ ta’n telewi’tasik St. John. Pemteskuwaseni to'q tapusijik mawimsekilkik Kopitk. Eteliktu’ enka’laseni kelaman ma’ kis wenaqa’tu’tikw sespo’taqen.
Ketu’ Telinka’laseni to'q as’ema na’te’l, ta’n Eteli Apaji Kwapskw (Reversing Falls) etek kiskuk. Eltoqes’ to'q ukplu’taqn ta’n ma’ kisi seaw so’qa’tilikwi sipuwiktuk. Pasena, ula kopitk to'q kisi piamteskewatisen’ Klu’skapal aq seawa’tisenik to'q Wulastuk, nike’ teluwi’tasik St.John River.
Klu’skap to'q wesuwa’toql tapu’kl kunte’jl aq taqemaji ula kopitk. Ula newte’jk kuntew na ika’qsep kenek kisoqwe’k sipuwiktuk aq Ekji Kwapskewa’sikesenek (Jikanipke/Grand Falls).
Na ektek Kuntew na me’ta’sen’ kopital. Eka’qes to'q ta’n etl kuntewapskwek, nike’ ta’n teluwisik Plaster Rock. Me’ nike’ kiskuk kisi nemit’esk mekwe’k pkwawlu’skw na pana’kiaqiktuk. Teluwa’tijik na wejiaq to'q kopit umal’temk.

Klu’skap na kaqi’sk eweka’seni wi’sesk ta’n o’pela’taqetijik aq eltoq 
na’tkoqwey kelu’lk. Kaqi’sk na asuwisukwis ula Wulastuk.
Je we’kaw kikju Pilijk (Kingsclear), ta’n Klu’skap weji ney’a’sip, ke’s mu ukplu’taqn Mactaquac el’tasiktenukek, eweketoqesn’ menapskwe’l uwjit kel’to’sin ta’nju nisietek. Klu’skap jel naqtekesenek ut napuwi’kayunemek na kun’tewiktuk, aq ta’n ut’ aqemk naqalaseni, na kawaskamukwa’sijik aq “Aqemey Meniku”weya’tijik (Snowshoe Islands).
Na wekela emset na niskamewe’kati’l. Je wekaw to'q pukelatemu’jk wikultisinik kikju utank Pilijk.

KINA’MUWAQN

Kelu’lk na koqwey kisiwtjiaktew je telia’ etli amsala’sik. Ekel mu kis tluwewun, epjiliw amkwes koqwey ankatemen ta’n tela’sik ki’l ektin’ek, kisna uwjit wen piluwey. Kisi kit’o’qa’siktew na koqwey aq wela’siktew awnaqa.
Emset Klu’skap ut a’tukwaqen’ na kekina’muksikw ta’n tetuji kepeme’kik
wi’sesk ula uwsitkamu’minak, aq paje ta’n tet wi’sesewiktuk wejitasik ta’n wikulti’kw. Emset koqwey na mimajik aq menuaqtoq kepmite’tasikten. Aq emset koqwey ta’n mimajik na kek’unk kelu’lk aq winjik. Ektekl etekl a’tukwaqn’ ta’n kopit kekenu’temuksi’kw uwjit ta’n tewji kepeme’k wen melki lukwen.


STORY told in original tongue